On this page:
NDIS thlennak pawl
NDIS kan pek ning ah kan thangcho cuahmah.
Cheukhat thlennawnnak pawl an um:
- NDIS na sok ning.
- Na plan kan sersiam ning.
- Na plan ah thlennawnnak pawl kan tuah ning.
- Na plan ah cazin khumhnak tuahpiaktu pawl.
Phungphai pawl asilole NDIS a riantuan ning cu kan thleng lo. Biakhiahnak kan tuah ning le NDIS tang i tangka bawmhnak pek kongkau ah thlennawnnak pawl an um lo.
Nihin aa telmi pawl ca le hmailei caah a thadeuhmi a phichuak pawl peknak a kan bawmh dingah, computer tuahto ning a thar kan ser i kan riantuan ning kan thanchoter. Kan computer tuahto ning a thar le thanchonak pawl cu Australia a kenkip ah theihternak tuah hram kan thawk.
A soktu pawl, aa telmi pawl asilole anmah bawmtu pawl caah atu lio ah tuah ding zeihmanh a um lo. Na NDIS lamthluan i tuah dingmi adang dot na hun phak tikah, bawmhnak le na herhmi kong fehter dingah nangmah he rian kan tuanti lai.
Hmunkhat te i rian kan tuanti fate, na plan ah zeibantuk computer tuahto ning dah a si timi kha kan in chimh lai. Cucu i ruahchan dingmi kha na fehter khawh lai i an bawmtu pawl asilole riantuanpiaktu pawl tibantuk nangmah caah a biapimi minung pawl sin ah hi thilsining cu na chimphuan khawh lai.
Kan website ah kan thlennak pawl kong tamdeuh na rel khawh.
Pehtlaihnak pawl tuahnak
NDIS nih pumtlinglo minung kha a bawmh khawh hna, NDIS soktu an si lo zong ah.
Kum 9 le 64 karlak minung na si ahcun, na umnak mibu i riantuanpiaknak pawl le bawmhnak pawl he kan in pehtlaihter khawh. Hihi mibu pehtlaihnak pawl tiah kan auh.
Ngakchia kum 9 nak in a no deuhmi pakhat caah bawmh na herh ahcun, tuandeuh pehtlaihnak pawl kan in pek khawh. Kum 65 asilole upa deuh na si ahcun, nangmah an bawm khotu dingmi tar zohkhenhnak lei riantuanpiaknak pawl kong i thilsining kha kan in chimh khawh.
Mibu pehtlaihnak pawl asilole tuandeuh pehtlaihnak pawl ngah dingah na tuah khawhmi cu:
- NDIS zung i minung pakhat khat kha chawn.
- 1800 800 110 ah hung kan chawn.
- Calehnak le Holhlehnak lei Riantuanpiaknak kha 131 450 ah chawn law NDIS he biaruah dingah bawmh hal.
Thilsining tamdeuh hmuhnak caah pehtlaihnak pawl tuahnak ah zoh.
NDIS soknak
NDIS na sok ning kha aa thleng lai.
NDIS caah aa tlakmi na si ahcun, NDIS na sokmi kha kan in bawmh lai.
NDIS sok dingin, ‘my NDIS contact’ (‘NDIS keimah pehtlaihnak’) na herh lai. Nangmah my NDIS contact cu NDIS ah nangmah le na chungkhar caah a biapimi pehtlaihnak a si.
An tuah dingmi cu:
- NDIS kong thilsining an in chimh lai.
- Na ngah khawhmi bawmhnak pawl i fian dingah an in bawmh lai.
- NDIS sok dingah an in bawmh lai.
Nangmah my NDIS contact kha NDIS riantuanti asilole Rampumpi Pumtlinlonak Aamahkhan lei Riantuanpiaknak (NDIA) riantuantu chungtel a si kho.
NDIS riantuanti pawl cu:
- Kum 9 nak in a no deuhmi ngakchia pawl a bawmmi tuandeuh ngakchia riantuanti pawl.
- Kum 9-64 karlak pumtlinglo minung pawl a bawmmi mah umnak hmun i tawlreltu pawl.
Nangmah my NDIS contact cu NDIA ah minung a si lai:
- Australia i a kideng deuh i na um ahcun.
- Hngalh a harmi bawmhnak pawl na herh ahcun.
- Tar zohkhenhnak ah a ummi mino na si ahcun.
- Siizung asilole thonginn i na um ahcun.
NDIS kha na sok hnu ah, kan biakhiahnak theihter dingin ni 21 chungah kan in pehtlaih lai. Thilsining tamdeuh zong kan in hal khawh men.
Aa tlakmi na si ahcun, NDIS aa telmi ah na cang lai. A hmasabik na NDIS timhtuahmi tuah dingah na soknak i na chimphuanmi thilsining pawl kha kan hman lai.
Aa tlakmi na si lo ahcun, aruang kan in chimh lai. Na NDIS riantuanti nih na umnak mibu i bawmhnak pawl he pehtlaihter dingah an bawmh lai.
Na umnak mibu i riantuanpiaknak pawl le bawmhnak pawl le pehtlaihnak pawl tuah dingah, asilole NDIS sok dingah, na tuah khawhmi cu:
- NDIS zung i minung pakhat khat kha chawn.
- 1800 800 110 ah hung kan chawn.
- Calehnak le Holhlehnak lei Riantuanpiaknak kha 131 450 ah chawn law NDIS he biaruah dingah bawmh hal.
Thilsining tamdeuh theihnak caah NDIS soknak kha zoh.
Na plan sernak
NDIS aa telmi na can tikah NDIS plan na ngah lai.
NDIS plan cu thilsining kong tialmi pakhat a si:
- Nangmah le naa tinhmi pawl kong.
- Na herhmi bawmhnak pawl.
- NDIS nih a pek dingmi bawmhnak pawl.
Na plan a rak tuahtu a simi NDIA suaisamhtu he plan lei meting ngeih dingah sawm na si lai.
NDIA suaisamhtu cu minung pakhat khat:
- NDIA i rian a tuanmi a si.
- NDIS plan a thar pawl a sermi a si.
- NDIS plan pawl a thlengmi a si.
- Na NDIS plan budget a suaimi a si.
Na plan lei meting ah, nangmah NDIA suaisamhtu nih an chimh dingmi kong cu:
- Na plan budget le bawmhnak pawl.
- Na plan kong i biakhiahnak an tuahmi pawl.
- Na plan tawlrel na duh ning.
- Na plan caah rikawt tuahtu pawl.
- Na plan nih thlennawnnak pakhat khat a herh tiah na ruahmi.
Na NDIS plan copy pakhat kan in kuat lai. Na plan zoh dingah ka NDIS aa telmi portal (luhnak) le ka NDIS app kha na hman khawh.
Kan computer tuahto ning a thar ah plan na ngeih lo ahcun, tangka pek dingmi halnak tuah dingah myplace aa telmi portal kha na hman peng a hau lai.
Nangmah my NDIS contact cu nangmah he biaruah dingah a thabikmi minung a si:
- Biahal awk na ngeih ahcun.
- NDIS he nan i biakchawnh tik i bawmhnak na herh ahcun.
Na plan chungah anmah pehtlaihnak kha na hmuh khawh lai.
Bawmhnak lei riantuantinak asilole damthannak lei cawnpiaktu i riantuanpiaknak pawl caah na plan ah tangka bawmhnak na ngeih ahcun, na plan hman dingah bawmhnak na ngah khawh:
- Bawmhnak lei tawlreltu – timhtuahnak le nangmah bawmhnak pawl hmannak ah an bawmtu minung pakhat khat.
- Damthannak lei cawnpiaktu – na lungthin damnak lei ah an bawmtu minung pakhat khat.
Na NDIS plan na ngah hnu ah, nangmah my NDIS contact nih na plan hman dingah nangmah bawmh dingin plan lei a takin riantuannak caah meting ngeih dingin a timhlamh lai.
Nangmah my NDIS contact nih na plan zeidah a lawh timi hal dingah kum khat ah voikhat nangmah he check-in (a chung luhnak) a tuah lai.
Thilsining tamdeuh hmuhnak caah kan website i na plan i fiang timi le na plan lei thennak pawl hmannak kha zoh.
Naa plan thlennak
Na nunnak ah thlennak pawl na ngeih, a sullam cu bawmhnak tamdeuh, tlawmdeuh asilole adang na herh ahcun, na plan kha zeitik caan paoh ah thlen dingin na hal khawh.
Na plan thlen dingah lam hnih an um – timhtuahnak danternak asilole timhtuahnak zohfelnak.
Timhtuahnak danternak cu atu lio na plan ah thlennak tlawmpal tuah kha a si. Plan lei zohfelnak cu na plan kha a thar in kan thlen tikah a si.
Nangmah my NDIS contact, bawmhnak lei tawlreltu asilole damthannak lei cawnpiaktu nih na plan thlennak kong biakhiah dingin kan herhmi thilsining le tehte ah an in chimh khawh lai.
Thilsining tamdeuh hmuhnak caah na plan thlennak ah zoh.
Keimah bawmchantu pawl
Na NDIS plan a thar nih riantuanpiaknak lei a hlankanh in chimhchawnnak a ngei lai lo.
Na plan ah NDIA- tawlrelmi tangka bawmhnak, pumtlinglo umthutnak lei tawlrelpiaktu, inn le umnak lei bawmhnak pawl asilole umtu hoiher lei bawmhnak pawl na ngeih ahcun, nangmah bawmhnak an petu kha zeibantuk bawmchantu dah an si kha na kan chimh a hau lai, cu ticun na plan chungah cazin ah kan khumh khawh lai.
Na plan ah cazin khumhnak tuahpiaktu pawl kha ‘keimah bawmchantu pawl’ tiah kan auh hna. Bawmhnak pawl an in pek tikah na plan chung i bawmchantu pawl nih na NDIS plan he aa ralchanh in tangka halnak an tuah khawh.
Na plan chung i cazin khumhnak tuahpiaktu pawl timi a sullam cu tangka kan pek hna hlan ah nangmah he dothlat kan hau lo tinak a si.
Nangmah my providers kha zeitik caan paoh ah na tharchuah khawh asilole na thlen khawh.
Thilsining tamdeuh hmuhnak caah keimah bawmchantu pawl (my providers) ah zoh.
NDIS pehtlaih
Manlo in calehtu asilole holhlettu kha 131 450 ah chawn law NDIS he biaruah dingah bawmh hal.
Nangmah my NDIS contact zong nih nangmah he nan i ton tikah asilole bia nan i ruah tikah holhlettu a tawlrel kho fawn.
Nangmah bawmchantu zong nih anmah he nan i ton tikah asilole bia nan i ruah tikah, holhlettu kha a tawlrel khawh men ko lai.
NDIS zung ah kal i holhlettu he biaruahnak dingah bawmh na hal kho fawn. NDIS website ah nangmah he a naihbiknak i a ummi NDIS zung kha kawl.
Fawi tein relmi
NDIS kong i thilsining cu Easy Read (Fawi tein Relmi) ah leh a si fawn. Minung tampi nih Easy Read chungum kha a thahnemmi ah an hmuh, Mirangca rel aa harhmi minung pawl telhchih in.
Easy Read i chungum zoh dingah Cazual pawl le NDIS i thilsining kong tialmi cahmai ah zoh.
Nunphung le Holh lei Idannak Tuahto ning
Nunphung le Holh lei Idannak (CALD) Tuahto ning 2024-2028 (Tuahto ning) cu kan ser i pungsan kan suaiti.
Pungsan suaitimi ti a sullam cu rian kan tuanti i aa telmi pawl, hawikom pawl, innchungkhar, zohkhenhtu pawl, NDIS riantuantu le pumtlinglo mibu sinin kan cawng tinak a si.
Tuahto ning cu CALD dirhmun in a rami minung 800 leng he pungsan kan suaiti.
Hihi cu NDIS thanchoter dingah kan biakamnak a si cu ticun kan sin ah aa telmi dihlak i nunphung le holh lei herhmi pawl kan tlinh khawh lai.
Tuahto ning peknak ah kanmah bawmh dingin, Tuahsernak Timhtuahmi kha kan ser i pungsan kan suaiti.
Hi nih hin Tuahto ning kalpi ziahmah kan herhmi a dot phunphun in a langhter. Lim dingin tuahsernak 28 an um.
CALD Tuahto ning A tawinak in tialmi dawnglawt (download):
CALD Tuahto ning le Tuahsernak Timhtuahmi Rel Fawi dawnglawt:
- Rel Fawi CALD Tuahto ning (PDF 3MB)
- Rel Fawi CALD Tuahto ning (DOCX 14.2MB)
- Rel Fawi CALD Tuahsernak Timhtuahmi (PDF 4.2MB)
- Rel Fawi CALD Tuahsernak Timhtuahmi (DOCX 15.7MB)
CALD Tuahto ning le Tuahsernak Timhtuahmi tling dawnglawt:
